ആഘോഷ ദിനങ്ങള്‍ അടുത്ത് വരുമ്പോള്‍ വല്ലാതെ അധികരിക്കുന്ന ചില കാര്യങ്ങളുണ്ട് ഒന്ന് : സന്തോഷം രണ്ട് : ആവേശം മൂന്ന് : തിടുക്കം നാല് : വേഗത അഞ്ച് : അപകടം ഈ അഞ്ചു കാര്യങ്ങള്‍ ഉണ്ടാകുമ്പോള്‍ കുറയാന്‍ സാധ്യതയുള്ള ചില കാര്യങ്ങളുണ്ട് ഒന്ന്‍ : വിവേകം രണ്ട് : ക്ഷമ മൂന്ന് : സംയമനം നാല് : പരിസര ബോധം അഞ്ച് : ആയുസ്സ് അത് കൊണ്ടാണ് ആഘോഷ നാളുകളില്‍ കേള്‍ക്കാന്‍ ഇഷ്ടപ്പെടാത്തത് നാം കേള്‍ക്കുന്നത് . ആഘോഷ ദിവസങ്ങളില്‍ വാഹനം ഓടിക്കുന്നവര്‍ മറ്റു വേളകളേക്കാള്‍ ശ്രദ്ധിച്ചും സൂക്ഷിച്ചും വാഹനം ഓടിക്കുക . ബൈക്ക് യാത്രക്കാരായ കൌമാരക്കാര്‍ സൂക്ഷിക്കുക ജീവിതം പാതി വഴിയില്‍ , തെരുവില്‍ അവസാനിപ്പിക്കേണ്ടി വന്ന പല കുട്ടികളുടെയും അന്തകനാകുന്നത് ബൈക്ക് ആണ് . അതില്‍ നല്ല ഒരു പങ്ക് ആഘോഷ വേളകളില്‍ ആണ് സംഭവിക്കുന്നത്‌ . ബൈക്കില്‍ വല്ലാതെ ചെത്തുമ്പോള്‍ പിറകില്‍ ഒരാളുണ്ട് എന്ന് ഓര്‍ക്കുക . പിറകിലിരിക്കുന്നത് നിങ്ങളുടെ സുഹൃത്ത്‌ അല്ല അവസരം കാത്തിരിക്കുന്ന മരണമാണ് എന്നും ഓര്‍ക്കുക . ആഘോഷ വേളകളില്‍ ഉല്ലാസ യാത്രയ്ക്ക് പോകുമ്പോള്‍ കൂടുതല്‍ ശ്രദ്ധിക്കുക . പരിചയം ഇല്ലാത്ത സ്ഥലങ്ങളില്‍ ഇറങ്ങുന്നതും കളിക്കുന്നതും കുളിക്കുന്നതും സൂക്ഷിച്ചു വേണം. ബൈക്ക് പോലെ തന്നെ ആഘോഷ വേളകളില്‍ ജീവനെടുക്കുന്ന മറ്റൊരിടം വെള്ളം ആണ് വെള്ളച്ചാട്ടങ്ങള്‍ പുഴകള്‍ അണക്കെട്ടുകള്‍ ഡാമുകള്‍ ഇവയുടെയൊക്കെ ഭംഗി ദൂരെ നിന്ന് ആസ്വദിക്കുക സാഹസത്തിന് മുതിരാതിരിക്കുക ! എത്ര സൂക്ഷിച്ചാലും നടക്കേണ്ടത്‌ നടക്കും എന്നാലും ചിലപ്പോള്‍ സൂക്ഷിച്ചാല്‍ ദു:ഖിക്കേണ്ടി വരില്ല . ആഘോഷങ്ങള്‍ ഇനിയും വരും അടുത്ത കൊല്ലവും ഉണ്ടാകും പക്ഷേ പോയാല്‍ പിന്നെ തിരിച്ചു വരാത്ത ഒന്നുണ്ട് . ജീവന്‍ അത് കൊണ്ട് എപ്പോഴായാലും എവിടെയായാലും ജീവന്‍ വെച്ച് കൊണ്ടുള്ള കളി വേണ്ട ! വിധി മൂലം വരുന്ന ദുരന്തങ്ങള്‍ നമുക്ക് തടയാന്‍ കഴിയില്ല . പക്ഷേ നമ്മുടെ കയ്യിലിരിപ്പ് കൊണ്ട് വരുന്ന ദുരന്തങ്ങള്‍ വലിയ വേദന സൃഷ്ടിക്കും . അത് കാലങ്ങളോളം ഉണങ്ങാത്ത മുറിവായി ശേഷിക്കും . നിങ്ങളെ കാത്തിരിക്കുന്നവരുടെ ഉള്ളിലും ഇഷ്ടപ്പെടുന്നവരുടെ മനസ്സിലും !