കോപ്പ അമേരിക്ക ഫൈനലിന് ശേഷം വിജയികളുടെ പോഡിയത്തിലേക്ക് നോക്കിയപ്പോൾ കോപ്പ കിരീടം ആയി ചിലെയെ കണ്ടു, മികച്ച ഗോളിക്കുള്ള അവാർഡ് ആയി ബ്രാവോയെ കണ്ടു, മികച്ച യുവതാരം ആയി മുറില്ലോയെ കണ്ടു, ടോപ് സ്കോറർ പുരസ്കാരം വാർഗാസിന്റെ കയ്യിലും കണ്ടു. എന്നാൽ ടൂർണമെന്റിന്റെ മികച്ച താരത്തെ എങ്ങും കണ്ടില്ല. ഇന്റെർനെറ്റിലും, വാർത്ത ചാനലിലും ഒന്നും അതിനെ പറ്റി വാർത്തകൾ കണ്ടില്ല. 2011 ഇൽ സുവാരസ് നേടിയ ആ പുരസ്കാരം ഇത്തവണ ആരാണ് നേടിയത്? അൽപം വൈകി ആണ് അറിഞ്ഞത്. മികച്ച താരം ആയി തിരഞ്ഞെടുക്കപ്പെട്ട ലയണൽ മെസ്സി, ആ പുരസ്കാരം സ്വീകരിക്കാൻ വിസ്സമതിച്ചു എന്ന്. വിമർശകരെ ഇവിടെ നിങ്ങൾക്ക് ജയിക്കാൻ കഴിഞ്ഞില്ല. ലയണൽ മെസ്സിയുടെ ദേശസ്നേഹത്തെ പറ്റി " വായിൽ വന്നത് കോതയ്ക്ക് പാട്ട്" എന്ന മട്ടിൽ ചിലയ്ക്കുന്ന എല്ലാ ഫെയ്സ്ബുക്ക്/ ട്വിറ്റെർ ഫുട്ബോൾ നിരൂപകർ ഒരു നിമിഷത്തേയ്ക്ക് എങ്കിലും തങ്ങളെ ഓർത്തു ലജ്ജിച്ചിരിക്കണം. വ്യക്തിപരം ആയ നേട്ടങ്ങൾക്ക് മെസ്സി എന്നും രണ്ടാം സ്ഥാനമേ കല്പിച്ചിട്ടുള്ളൂ. ലോകകപ്പിൽ മികച്ച താരത്തിനുള്ള ഗോൾഡൻ ബോൾ നേടിയപ്പോൾ തല കുനിച്ചു നിൽക്കുന്ന അയാളുടെ മുഖം ഇന്നും മനസ്സിൽ ഉണ്ട്. ലോകകപ്പിൽ പരാജയപ്പെട്ടപ്പോഴും, കോപ്പയിൽ പരാജയപ്പെട്ടപ്പോഴും അയാൾ ആരെയും പഴിച്ചില്ല. സഹതാരങ്ങളെയോ, കോച്ചിനെയോ കുറ്റപ്പെടുത്താതെ മുഴുവൻ ഉത്തരവാദിത്വം സ്വയം ഏറ്റെടുക്കുകയാണ് അയാൾ ചെയ്തത്. ഇന്നലെ മത്സര ശേഷം സഹകളിക്കാർ കടുത്ത തണുപ്പിനെ പ്രതിരോധിക്കാൻ ടീം ജാക്കറ്റ് തേടുമ്പോൾ, ഏകനായി മൈതാനത്തിന്റെ മദ്ധ്യേ ഇരിക്കുക ആയിരുന്നു അയാൾ. ഒരു പക്ഷെ അയാൾ ആ തണുപ്പ് അറിഞ്ഞു കാണില്ല. തോൽവിയുടെ ദു:ഖത്താൽ മരവിച്ചിരികണം അയാളുടെ മനസ്സ്. ഹൃദയ ഭേദകം ആയിരുന്നു ആ കാഴ്ച. ഇതേ സമയം അയാളുടെ കുടുംബം ചിലിയൻ ആരാധകരാൽ ആക്രമിക്കപ്പെട്ടത് ആ മനുഷ്യൻ ഒരു പക്ഷെ അറിഞ്ഞു കാണില്ല. അതും ആഘോഷിച്ചു, 5 ഇഞ്ച് സ്ക്രീനിൽ വിമർശിക്കുന്ന സോഷ്യൽ മീഡിയ നിരൂപകർ. ഇപ്പോൾ ടെലിവിഷനിലും കണ്ടു, നമ്മുടെ നാട്ടിലെ ഫുട്ബോൾ ബുജികൾ പ്രസംഗിക്കുന്നത്. അർജ്ജന്റീന തോറ്റു അല്ലെങ്കിൽ ചിലെ ജയിച്ചു എന്നതിലും വാർത്ത മെസ്സിക്ക് കിരീടം നേടാൻ ആയില്ല, മെസ്സി പരാജയപ്പെട്ടു എന്നതാണ്. കഴിഞ്ഞ ദിവസം "ഹേമമാലിനി സഞ്ചരിച്ച കാർ അപകടത്തിൽ, നടിക്ക് പരിക്ക്" എന്ന തലക്കെട്ടോടെ വന്ന ഒരു വാർത്ത ഓർത്തു പോകുന്നു. ഒരു കുഞ്ഞു ആ അപകടത്തിൽ മരിച്ചത് അവർക്ക് വാർത്തയല്ല. അതെ മനോഭാവം ആണ് അവർക്ക് മെസ്സിയുടെ കാര്യത്തിലും. സച്ചിൻ തെണ്ടുൽകർ ആണ് മറ്റൊരു ഇര. സച്ചിൻ 100 അടിച്ചാൽ ഇന്ത്യ പരാജയപ്പെടും പോലും . ടീം അംഗങ്ങൾ രണ്ടക്കം കടന്നു കാണില്ല, സച്ചിൻ 100 അടിച്ചതാണ് തോൽവിക്ക് കാരണം എന്നായിരുന്നു അവരുടെ വാദം . സച്ചിൻ എപ്പോ വിരമിക്കണം, സച്ചിൻ എങ്ങനെ കളിക്കണം എന്ന് പറയാൻ കുറെ പേർ അന്നും ഉണ്ടായിരുന്നു . സച്ചിന്റെ കരിയറിന്റെ അവസാന കാലത്ത് ആണ് സോഷ്യൽ മീഡിയ സജീവം ആയതു. അല്ലെങ്കിൽ ഒരുപക്ഷെ അദ്ദേഹത്തെ നേരത്തെ വിരമിപ്പിക്കുമായിരുന്നു നമ്മുടെ മാധ്യമങ്ങളും സോഷ്യൽ മീഡിയയും . ഇന്ത്യൻ നായകൻ മഹേന്ദ്ര സിംഗ് ധോണിയും, മുൻ നായകൻ ഗാംഗുലിയും ഇവരുടെ ഇരകൾ ആണ്. ഈ പരാജയം കൊണ്ട് ലയണൽ മെസ്സി തളർന്നു പോകില്ല. അയാളുടെ കരിയറിലെ എറ്റവും പ്രധാനപ്പെട്ട നാളുകൾ ആണ് ഇനി വരാൻ പോകുന്നത്. അയാൾക്ക് നടന്നേ പറ്റൂ. സച്ചിൻ തെണ്ടുൽകർ സ്വീകരിച്ച അതെ പാത ആണ് മെസ്സിയും സ്വീകരിക്കേണ്ടത് . "Enjoy the game & chase your dreams. Never find shortcuts. Dreams come true" .